Chernobyl sop

Hoop jy sal hierdie amusant vind. Ek het al beter dae gehad.

OK, hier is die verloop van gebeure. Dis Woensdagmiddag 4pm. Ek ry van die kantoor af om vir Henrico by die Gautrein te gaan oplaai. Hy kom kuier vir die naweek. Ek laai hom spoedig by die woonstel af, want ek wil voor 5pm weer terug wees by die kantoor wanneer die mark toemaak.

Maar terselftertyd moet ek gehoor gee aan my maag en ‘n paar hongerpyne stil. So ek dog dis ‘n goeie idee om gou ‘n cup-of-soup in te werk.

Hier volg die probleem. Elke keer wat ek ‘n cup-of-soup aanmekaarslaan, vorm daar ‘n groot onopgeloste klont op die beker se bodem. Ek dog toe dis tyd om dinge ordentlik te roer — met die blender. Soos wat ek met die protein shakes maak.

Enige iemand wat wetenskap op skool gehad het moes nou reeds ‘n wenkbrou lig. Maar ek was haastig en het nie mooi gefokus nie, so ek gooi toe die soppoeier in die blender en voeg ‘n ruim porsie kookwater by.

Ek sit die deksel op en draai die skakelaar.

Kaboom. ‘n Sop-sampioen ontplof in die rigting van die ceiling. Dit lyk soos iets uit ‘n tweede-wêreldoorlog-movie. Die blender se deksel het afgeskiet en die mengsel het uitgebars oor die hele kombuis. Soos Jack Parow. Van die dak tot die grond.

Ek uiter ‘n paar kragwoorde. Dit help nie. Ek moes seker dankbaar wees vir die beskerming wat my baadjie gebied het. Dit moes egter summier in die wasmasjien beland, tesame met alles anders waarin ek geklee was.

Dit is moeilik om met woorde te beskryf watter gemors nagelaat is. Die ketel. Die toaster. Die snackwicher. Die kombuisskaal. Die spice rack. So kan ek heeldag aanhou. Ek moes die appels een-vir-een afdroog.

Ek het vandag weereens besef daar is net een vertrek waarin ek slegter is as in die garage. En dis die kombuis. Mens sou sweer die blender val in dieselfde kategorie as power tools.

Ek moes dit egter sien kom het — het moes oorgenoeg ervaring in die gebied. Vuurspuwende fudge en dies meer. Dit kook mos eers oor wanneer jy die warm mengsel met ‘n houtlepel penetreer.

Vandaar die probleem. Moenie die warm partikels versteur nie. En die ironie van die saak is dat my pa ‘n wetenskap-onderwyser was. Hy sou so trots wees.

NS — moet asseblief nie hierdie email vir Santam aanstuur nie, anders gaan my premie weer op. Ek is mos ‘n risiko.

cupofsoup+ blender=pentagram

 

Featured img from https://edtrigger.files.wordpress.com/2009/03/clown-mushroom-cloud.jpg

2 thoughts on “Chernobyl sop”

Leave a Reply

Your email address will not be published. Required fields are marked *